У Беларусі 22 сакавіка аддаюць даніну памяці жыхарам вёскі Хатынь і тысяч беларускіх вёсак, знішчаных нямецка-фашысцкімі захопнікамі ў гады Вялікай Айчыннай вайны.

У 1941 годзе ў вёсцы Асавец было 32 двары, 135 жыхароў. 20 кастрычніка 1943-га акупанты акружылі вёску, усіх жыхароў сагналі да царквы і пачалі допыт пра партызан. Але людзі маўчалі. Нічога не далі і катаванні. Тады акупанты расстралялі мужчын, жанчын сагналі ў хлеў і падпалілі. Карнікі загубілі 28 чалавек. Такія факты прыведзены ў кнізе «Памяць».

Карпатліва збіраў звесткі аб лёсах землякоў, жорсткай крывавай вайне для кнігі «Праз смерць і пакуты» краязнавец Алесь Раткевіч.

– Вайна закранула кожную сям’ю ў Асаўцы. Страчанае вярнуць немагчыма. А захаваць памяць аб загінулых – наш святы абавязак. Што і робяць мясцовыя ўлады сумесна з дзяржаўнымі ўстановамі і неабыякавымі жыхарамі Чысцінскага сельсавета, – акцэнтуе Алесь Раткевіч. – У Асаўцы, на месцы трагедыі, пасля вайны быў устаноўлены помнік. А ў 2020 годзе сумеснымі намаганнямі Чысцінскага сельвыканкама і мясцовай грамадскасці ўстаноўлена мемарыяльная канструкцыя з прозвішчамі не толькі загінулых мірных жыхароў Асаўца, але і тых, хто не вярнуўся з вайны.

Людміла ЦАР
Фота: Аляксей ПЛАТКО