Трактарыст-машыніст СУП «Хажоваагра-2009» Сяргей МАНДРЫК у ліку іншых быў прызнаны лепшым работнікам сельскай гаспадаркі Маладзечаншчыны па выніках работы за мінулы год. Яго імя будзе занесена на Дошку гонару Маладзечанскага раёна.

Нарадзіўся Сяргей Пятровіч на Вілейшчыне, у вёсцы Селішча. Спецыяльнасці вучыўся ў Вілейцы. Пэўны час працаваў у перасовачнай механізаванай калоне. У калектыў гаспадаркі ўліўся чатыры гады таму.

– Работа ў нас разнастайная, заработная плата задавальняе, – зазначыў Сяргей Мандрык. – Цяпер, у час масавых палявых работ, заняты на падрыхтоўцы глебы, ворыве. Потым надыдзе чарга корманарыхтоўкі. Зімой вывозіў арганіку на палі. Увогуле, работа на вёсцы заўсёды знойдзецца.

Працуе наш субяседнік на энерганасычаным трактары «Беларус». Тэхніка новая. Магчымасці яе вялікія. Любоў да тэхнікі Сяргею Мандрыку прывіў яго бацька, які працаваў на магутным «Кіраўцы».
Жыве Сяргей Пятровіч у горадзе. У яго сям’і гадуюцца трое дзяцей. Сыну адзінаццаць гадоў, дочкам – шэсць і два з паловай. У час піку палявых работ працаваць даводзіцца ад цямна да цямна. Дзяцей тады бачыш рэдка. Аднак блізкія спецыфіку работы разумеюць.

– Працаваць у сельскай гаспадарцы перспектыўна і выгадна, – падкрэсліў субяседнік. – Галоўнае, каб было жаданне прынесці карысць сабе і грамадству. Быць хлебаробам – пачэсна. Гэта ведаюць усе.

Тэкст і фота: Алег БЯГАНСКІ