Трывогу забілі бацькі выхаванцаў: у памяшканнях на другім паверсе, дзе трохгадовыя дзеці гулялі, елі і спалі, тэмпература паветра панізілася да +13 градусаў. У адным з памяшканняў нават быў сфатаграфаваны тэрмометр з такой адзнакай на шкале.
Гэта інфармацыя хутка разляцелася па інтэрнэт-парталах і сацыяльных сетках. Зноў жа са спасылкай на бацькоў гаварылася аб тым, што каб дзеці не замерзлі, іх выводзілі пагрэцца ў больш цёплыя групы на першым паверсе. Але на час прыёму ежы і сну зноў вярталі ў халодныя пакоі.
Сітуацыю пракаменціравала загадчыца дзіцячага сада №28 Наталля Бялова. Па яе словах, такая тэмпература сапраўды была ў трох групавых блоках – гэта адна сярэдняя і дзве старэйшыя групы для дашкольнікаў адпаведна ад чатырох і пяці гадоў.
— У памяшканнях пахаладала ў панядзелак, 9 студзеня, пасля таго як напярэдадні прыціснулі моцныя маразы. Выхавальнікі, рабочы дзень якіх пачынаецца з сямі гадзін раніцы, хутка сарыентаваліся ў сітуацыі, — тлумачыць Наталля Лафер’еўна. — Дзяцей мы не вадзілі з паверха на паверх. Літаральна на працягу гадзіны па меры прыходу выхаванцаў іх размяшчалі ў больш цёплых групах на першым паверсе.
Будынак сада ўзведзены ў 1980 годзе. Бывала, у залежнасці ад надвор’я на другім паверсе будынка тэмпература паветра паніжалася ў трох групавых блоках, вокны якіх выходзяць на поўнач (у адным блоку яны выходзяць на поўдзень, і там тэмпература трымаецца стабільная). У крытычных выпадках выкарыстоўваюцца адзін або два масленыя абагравальнікі, каб падтрымліваць дапушчальныя для дашкольных устаноў «плюсавыя» 19-21 градус, што адпавядае санітарным нормам, правілам і гігіенічным нарматывам Рэспублікі Беларусь.
Сітуацыя, што склалася ў дзіцячым садзе №28, на кантролі ў мясцовых улад, аддзела адукацыі, спорту і турызму райвыканкама, КУП «Камунальнік». Кіраўніцтва гэтых структур і іншых зацікаўленых службаў наведала дашкольную ўстанову. Да прыкладу, літаральна ў час нашага прыходу ў садзе пабываў старшыня райвыканкама Аляксандр Яхнавец.
— У бліжэйшы час у праблемных памяшканнях пачнуць мяняць вокны (неабходна замяніць дзевяць адзінак) на шклопакеты. Таксама плануецца часткова ўцяпліць фасад будынка. А па завяршэнні ацяпляльнага сезона будуць дадаткова ўстаноўлены батарэі. Адпаведныя работы правядуць гаспадарчым спосабам, — падкрэсліла начальнік аддзела адукацыі, спорту і турызму райвыканкама Іна Драпеза.
У сераду, 11 студзеня, у праблемных памяшканнях тэмпература паднялася да +17 градусаў. У гэты дзень у садзе было 126 дзяцей. Наогул па спісе тут 260 выхаванцаў. Адсутнасць большай колькасці дашкольнікаў не звязана з павелічэннем захворваемасці. Напрыклад, некаторыя бацькі знаходзяцца ў водпуску і праводзяць яго разам з дзецьмі альбо пакідаюць іх дома па іншых прычынах.
Фота: Аляксей Платко.
