17.10.2022 14:22

Морква ўрадзіла на славу

Сялянская гаспадарка Алены Троцкай спецыялізуецца на вырошчванні агародніны. У час збору ўраджаю на фермерскім полі працуюць добраахвотныя памочнікі.

Алена Троцкая ўраджаем задаволена. Алена Троцкая ўраджаем задаволена.

Калі мы наведалі гаспадарку, тут убіралі моркву. На полі было чалавек дваццаць. Мужчыны вырывалі караняплоды, жанчыны зразалі маркоўнік, сартавалі моркву і збіралі ў мяшкі. Яшчэ некалькі чалавек працавалі на складзе. Надвор’е спрыяла ўборцы. Пад ласкавым асеннім сонцам караняплоды хутка падсыхалі. Гэтага патрабуе тэхналогія ўборкі.

— Пад моркву ў гаспадарцы занята каля двух гектараў, — паведаміла Алена Троцкая. — Вырошчваем таксама бульбу, капусту, цыбулю, буракі. З-за гарачага і сухога лета другі хлеб сёлета ўрадзіў горш, чым летась. Затое астатняя агародніна парадавала. Ураджайнасць сталовых буракоў, напрыклад, склала каля 500 цэнтнераў з гектара.

Субяседніца адзначыла, што попыт на вітамінную прадукцыю вялікі. Пастаўкі ажыццяўляюцца ў магазіны, сацыяльныя аб’екты (бальніцы, дзіцячыя сады і г.д.). Без агародніны цяжка сабе ўявіць рацыён харчавання. Таму ўбраць вырашчанае трэба ў мінімальныя тэрміны. Тым больш калі гэтаму садзейнічае надвор’е.

— У час уборачнай дапамога ўдзельнікаў аплачваемых грамадскіх работ вельмі дарэчы, — падкрэсліла Алена Аляксандраўна. — Накіроўвае работнікаў раённая служба занятасці. Яна арганізуе дастаўку людзей да месца работы і адвоз іх у Маладзечна. Дзякуючы службе дапамога ва ўборцы агародніны заўсёды гарантаваная.

Задача мужчын — вырываць караняплоды і складаць роўнымі радамі.

Людзі працуюць на фермерскім полі з дзевяці гадзін раніцы да шасці вечара. Ёсць паўгадзінны перапынак на абед і яшчэ некалькі кароткіх. За сваю работу яны атрымліваюць па 25 рублёў за дзень плюс бясплатную агародніну. Такія ўмовы зацікаўліваюць многіх.

— Добраахвотныя памочнікі працуюць сумленна. Некаторыя прыязджаюць на фермерскія палеткі на працягу ўжо некалькіх гадоў, — падкрэсліла Алена Троцкая.

Леанід Якімчук расказаў, што дзякуючы ўдзелу ў аплачваемых грамадскіх работах ёсць магчымасць нарыхтаваць сабе агародніну на зіму і такім чынам сэканоміць сямейны бюджэт. Ды і наяўныя грошы не лішнія. Па магчымасці маладзечанец плануе прыязджаць да фермера і надалей.

Галіна Ільюшэнка на пенсіі, але сядзець без справы не прывыкла. А на полі можна і грошы падзарабіць, і агародніну нарыхтаваць, і далучыцца да карыснай справы.

— Ураджай, які я дапамагаю збіраць, трапіць на стол многім людзям. І яны будуць удзячныя за вырашчаную прадукцыю.

Галіна Ільюшэнка (справа) дапамагае фермеру не першы раз.

Тэкст і фота: Алег БЯГАНСКІ.

 

Прочитано 185 раз
Алег Бяганскі

Этот адрес электронной почты защищён от спам-ботов. У вас должен быть включен JavaScript для просмотра.