07.07.2022 10:46

Папараць-кветка цвіце ў Маладзечне, шчасце і радасць дорыць навечна…

Па шматгадовай традыцыі ў купальскую ноч у парку Перамогі плялі вянкі, вадзілі карагоды, спаборнічалі ў лоўкасці, запальвалі вогнішча, шукалі папараць-кветку і прызнаваліся ў каханні.

Дрэннае надвор’е не перашкодзіла аматарам народных традыцый акунуцца ў атмасферу аднаго з самых любімых свят «Купальскі фэст».


Яшчэ да яго пачатку супрацоўнікі бібліятэкі сямейнага чытання «Верасок» на чале з загадчыцай Лідзіяй Якуш праводзілі гульнявую праграму для юных жыхароў горада «Гісторыя вачыма дзяцей».


Хлопчыкі і дзяўчынкі збіралі чароўныя зёлкі, адгадвалі тэматычныя загадкі і нават стваралі жывую мумію.

-- Мы даведаліся пра свята і вырашылі прыйсці, паўдзельнічаць у гульнях. Мы жывём у адным двары на вуліцы Багдана Хмяльніцкага, сябруем. Мы адна каманда! – дзяліліся ўражаннямі Даша Лукоўская, Насця Мікуліч, Цімафей Сідаровіч, Фаіна Відзякіна.

Ля увахода ў Летні амфітэатр публіку запрашалі на свята роставыя лялькі, здымкі з якімі застануцца ў многіх гараджан.


З сімвалічным купальскім вянком і прывітальнымі словамі выйшлі ў народ галоўныя дзеючыя героі прадстаўлення Купаліш (Павел Данілаў) і Купалінка (Ганна Шыцік). Паўлу і ў мінулыя гады даводзілася быць у гэтай ролі, а вось для Ганны гэта своеасаблівы дэбют. Але дзяўчына не хвалявалася.


-- Я з трох гадоў на сцэне, Палац культуры, амфітэатр для мяне нібыта родны дом! – з усмешкай гаворыць чароўная Купалінка.

Не менш артыстычнымі, абаяльнымі былі на сцэне Марыя Мелінг, Ганна Рухадзэ, Анастасія Багушэвіч, якія ігралі ролі сястры, сябровак Купалінкі.

Штогод на Купалле творчыя і крэатыўныя супрацоўнікі гарадскога Палаца культуры прыдумваюць нешта новае, здзіўляюць гледачоў рознымі забавамі, запрашаюць самабытных артыстаў. Так было і на гэты раз. Сцэнарыст Марына Юхневіч прадугледзела ўсё, каб гледачы не сумавалі, актыўна спаборнічалі ў конкурсах і разам з артыстамі на сцэне былі паўнапраўнымі ўдзельнікамі купальскага фэсту, даведаліся нешта новае аб народных традыцыях.

Павесялілі публіку дасціпнымі жартамі і песнямі госці з Вілейшчыны – удзельнікі народнага гумарыстычнага калектыву «Смехата» Ільянскага сельскага Дома культуры.


Тэматычную праграму падрыхтаваў заслужаны аматарскі калектыў Рэспублікі Беларусь ансамбль песні і танца «Спадчына» імя Іосіфа Сушко. Прыгожы танец «Карагод» падарылі гледачам юныя танцоры з узорнага харэаграфічнага ансамбля «Сонечныя праменьчыкі».


Шмат уражанняў засталося ў гледачоў ад грандыёзнага фаер-шоу і неонавага шоу, што прайшлі на востраве ў парку. А затым па традыцыі там расклалі вялікае вогнішча. Удзельнікі свята, як некалі іх далёкія продкі, глядзелі на яго яркія іскры і спадзяваліся, што чароўны купальскі агонь знішчыць усё нядобрае, асвеціць шлях да здзяйснення самых запаветных мар.

Анжаліка КРУПЯНЬКОВА.
Фота: Віталій КРУПЯНЬКОЎ.

Прочитано 218 раз Последнее изменение 07.07.2022 10:46
Анжаліка Крупянькова

Этот адрес электронной почты защищён от спам-ботов. У вас должен быть включен JavaScript для просмотра.