23 жніўня жыхары  Відзеўшчыны адзначылі свята вёскі.

Аграгарадок знаходзіцца за 25 кіламетраў ад Маладзечна, уваходзіць у Красненскі сельсавет.
Для благаславення свята запрасілі святара царквы Пакрова Прасвятой Багародзіцы ў в. Краснае протаіерэя Мікалая Хадакоўскага.

З прывітальным словам да жыхароў звярнулася старшыня Красненскага сельвыканкама Валянціна Кісель. Яна падзякавала ім за арганізаванае свята, а таксама ўручыла ўзнагароды.

Ганаровымі граматамі Маладзечанскага раённага Савета дэпутатаў былі ўзнагароджаны Дзіяна Кучко і Наталля Ігнатовіч. Падзякі райкама ГА «Беларускі рэспубліканскі саюз моладзі» былі ўручаны Ангеліне Вараксе і Аліне Кучко.

Шчыра віталі на свяце работнікаў сельскагаспадарчай галіны, тых, хто сваёй шматгадовай працай заслугоўвае асаблівай падзякі. Сярод іх Юрый Шпакаў, Мая Шумская, Юрый Францкевіч і іншыя.

Ушаноўвалі ў гэты дзень мнагадзетныя сем’і, якія ўнеслі асаблівы ўклад у дэмаграфію, – Малюш і Хітрун. Адзначылі і самую маленькую жыхарку аграгарадка Лізавету Ляговіч, якая нарадзілася 9 снежня 2024 года ў дружнай вясковай сям’і.

Самыя бурныя апладысменты сабрала сям’я Богдан: Ганна Кірылаўна і Георгій Якаўлевіч жывуць разам ужо 59 гадоў. Тут у вёсцы прайшлі іх юнацтва, працоўная сталасць, тут выраслі іх дзеці, унукі, падрастаюць праўнукі. 57 гадоў сямейнага жыцця адзначыла яшчэ адна выдатная пара – Надзеі і Уладзіміра Спецыян. Гэта сапраўдная казка аб каханні, павазе і падтрымцы. За сумесныя гады яны прайшлі праз мноства выпрабаванняў, але заўсёды заставаліся побач адзін з адным. Іх дом напоўнены цяплом, смехам і ўспамінамі аб шчаслівых момантах.

Напярэдадні святкавання ў Відзеўшчыне аб’явілі конкурс на лепшую вуліцу. Аднак журы так і не змагло выбраць адну пераможцу. Таму кожная вуліца была прызнана лепшай і атрымала памятныя сувеніры.

У святочны дзень смехам і радасцю напаўнялася наваколле Відзеўшчыны.

Дзіяна ЗЕЛЯНКО
Фота: архіў Відзеўшчынскага СДК