Хутка адкрыецца спартыўная пляцоўка
-- Колькі ўстаноў адукацыі Маладзечаншчыны прымуць дзяцей першага верасня? Магчыма, праведзена рэарганізацыя?
-- Будуць функцыянаваць 46 дашкольных устаноў, а таксама 28 школ і 5 гімназій. Хоўхлаўскі вучэбна-педагагічны комплекс рэарганізаваны ў дзіцячы сад. Самыя малаколькасныя (вучняў не больш за 40) – Селеўская, Раёўская і Гарадокская базавыя школы.
Дашкольнай адукацыяй будуць ахоплены прыкладна 5,5 тысяч хлопчыкаў і дзяўчынак, 15,5 тысяч вучняў прыйдуць у школы і гімназіі. Упершыню пераступяць парог дзіцячых садоў каля тысячы выхаванцаў, а першакласнікаў у нас паўтары тысячы. Колькасць дзяцей змяншаецца нязначна.
-- Якія фінансы давялося патраціць, каб прывесці ў належны стан установы адукацыі?
-- З абласнога і раённага бюджэту выдаткавана каля паўтара мільёна рублёў. Сродкі накіраваны найперш на ліквідаванне недахопаў па прадпісанням камітэта дзяржкантролю, занальнага цэнтра гігіены і эпідэміялогіі, а таксама на прыняцце мер супрацьпажарнай бяспекі.
Зроблены бягучы рамонт дахаў і фасадаў, добраўпарадкаванне тэрыторый, электрамантажныя работы. Завяршаецца капрамонт пераходнай галерэі ў Чысцінскай сярэдняй школе. Працягваюцца работы па будаўніцтве шматфункцыянальнай спартыўнай пляцоўкі, адкрыццё якой запланавана на жнівень-верасень у СШ №12.
«Адзінка» і «двойка» сталі нездавальняючымі
-- У чым асаблівасці па арганізацыі новага навучальнага года?
-- З уступленнем у сілу новага Кодэкса аб адукацыі зменяцца віды ўстаноў дашкольнай і агульнай сярэдняй адукацыі: яслі-сады будуць перайменаваны ў дзіцячыя сады, вучэбна-педагагічныя комплексы – у школы. З’явіцца магчымасць атрымліваць дашкольную адукацыю на даму (па медыцынскіх паказаннях). Адпаведныя ўстановы змогуць рэалізоўваць праграму дадатковай адукацыі для дзяцей і моладзі.
Зацверджаны Дзяржаўны школьны стандарт, галоўныя мэты якога забяспечыць эфектыўны адукацыйны працэс, бяспечныя ўмовы знаходжання ва ўстановах агульнай сярэдняй адукацыі, умацаванне дысцыпліны і правапарадку. Асабліва важна дасягнуць супрацоўніцтва і ўзаемападтрымкі між усімі ўдзельнікамі адукацыйнага працэсу.
З мэтай гэтага і павышэння прэстыжу, статусу нашай прафесіі зацверджаны Правілы (у пераліку – дзесяць) педагагічных работнікаў. Згодна з дакументам, яны павінны, напрыклад, захоўваць тайну асабіста даверанай ім інфармацыі, а ў медыяпрасторы – этычныя прынцыпы і нормы. Безумоўна, кожны прадстаўнік прафесіі павінен быць сумленным, шчырым, справядлівым і адкрытым для стасункаў.
-- Якія асноўныя новаўвядзенні будуць непасрэдна ў адукацыйным працэсе?
-- Адбыліся змены ў выніковай атэстацыі навучэнцаў па завяршэнні навучання і выхавання на II і III ступенях агульнай сярэдняй адукацыі. Пасля дзявятага класа прадугледжаны абавязковыя экзамены па беларускай і рускай мовах (пісьмовыя пераказы), матэматыцы (экзаменацыйная работа таксама пісьмовая). Новы іспыт -- па гісторыі Беларусі: у білетах – вусныя і практычныя заданні.
Пасля 11-га класа – выніковыя цэнтралізаваныя экзамены па матэматыцы, беларускай або рускай мове (па выбары навучэнцаў).
Па замежнай мове па завяршэнні навучання і выхавання на III ступені агульнай сярэдняй адукацыі ў новым навучальным годзе іспыт праводзіцца не будзе.
Адпаведна тыпавым вучэбным планам, для ўсіх 9-класнікаў у курс гісторыі Беларусі ўводзіцца абавязковы вучэбны модуль «Вялікая Айчынная вайна». У 10-11 класах на вывучэнне беларускай і рускай моў адведзена на гадзіну больш у тыдзень, чым раней, на замежныя – на гадзіну менш.
Таксама з новага навучальнага года здавальняючымі стануць адзнакі ад трох да дзесяці балаў, нездавальняючымі -- нуль, адзін і два (да гэтага быў толькі «0»).
Забягаючы наперад, заўважу, што з наступнага 2023/2024 навучальнага года плануецца правядзенне Нацыянальнага даследавання якасці адукацыі. Яго мяркуецца арганізоўваць раз у два гады ў камп’ютарным фармаце анкетавання. Прадмет вывучэння – вынікі ацэнкі функцыянальнай адукаванасці навучэнцаў.
Пайшоў у школу – атрымаў прафесію
-- Ужо ў час вучобы старшакласнікі могуць атрымаць тую ці іншую прафесію альбо выбраць для сябе профільную накіраванасць для далейшага паступлення ў ВНУ…
-- Гэтыя накірункі дзейнасці мы прадоўжым. Як і раней, запланавана адкрыццё профільных класаў (10-11-х) з вывучэннем на павышаным узроўні беларускай, рускай, замежных моў, матэматыкі, біялогіі, хіміі, фізікі, грамадазнаўства, гісторыі Беларусі, фізічнай культуры і здароўя. Таксама будуць профільныя класы педагагічнай, спартыўна-педагагічнай, прававой, аграрнай накіраванасці.
Разам з гэтым, на базавым узроўні ў рамках вучэбнага прадмета «Працоўнае навучанне» можна атрымаць запатрабаваныя на рынку працы прафесіі -- повара, тынкоўшчыка, афіцыянта, сталяра, прадаўца, сакратара, агента па турызме, электраманцёра па эксплуатацыі электралічыльнікаў, аператара ЭВМ, кандытара, слесара па рамонце сельскагаспадарчых машын і абсталявання і нават медыцынскай сястры. Неабходныя ўмовы для гэтага створаны як у школах, так і ў мясцовых каледжах.
-- З асаблівым настроем чакаюць 1 Верасня маладыя спецыялісты. Колькі іх сёлета прыйдзе ў сферу адукацыі раёна?
-- Нашым упраўленнем пададзены 133 заяўкі. Маладыя спецыялісты прыбываюць па месцы назначэння. У іх ліку настаўнікі пачатковых класаў, гісторыі, замежных моў, выхавацелі. Адметна, што на малую радзіму вяртаюцца маладзечанцы. Але мы таксама рады і іншагароднім, паколькі нярэдка яны застаюцца ў нашым раёне і замацоўваюцца ў прафесіі.
Фота: Аляксей Платко