Улічваючы значнасць гэтай падзеі, створаны рэспубліканскі арганізацыйны камітэт па падрыхтоўцы і правядзенні юбілейных культурна-інфармацыйных мерапрыемстваў. Як зазначыў намеснік міністра інфармацыі Рэспублікі Беларусь Алесь Карлюкевіч, іх галоўная мэта – паказаць ролю і значнасць нашай краіны ў стварэнні і прымнажэнні сусветнай культурнай спадчыны, уклад сучаснай Беларусі ў справу ўмацавання міру і ўзаемаадносін паміж народамі.

Асобная тэма – гістарычнае значэнне асветніцкай дзейнасці Францыска Скарыны, выданні якога сталі фундаментам нацыянальнай культуры, унеслі значны ўклад у развіццё еўрапейскай цывілізацыі. Яшчэ ў канцы мінулага года ў Нацыянальнай бібліятэцы адбылася прэзентацыя трохтомнай энцыклапедыі «Францыск Скарына». Чакаецца выхад новай кнігі на рускай мове, прысвечанай нашаму кнігадрукару, а таксама факсіміле поўнага збору кніг Скарыны.

На яго радзіме ў Полацку (сёлета горад адзначае сваё 1155-годдзе) пройдзе Дзень беларускага пісьменства, які стане агульнанацыянальным святам.