10.02.2024 11:46

З вёдрамі на галовах і віламі ў руках

На якія толькі хітрыкі не ішлі ўдзельнікі IІ адкрытага конкурсу харэаграфічнага мастацтва «Кропка», каб здзівіць журы і публіку!

У час выступленняў у якасці прадметаў яны выкарыстоўвалі металічныя вёдры, з якіх неспадзявана сыпаўся «сярэбраны дождж», стваралі магічны вобраз стылізаванымі віламі, зачароўвалі капелюшамі і нават распраналіся да мініяцюрных топаў…

«Кропка» аб’яднала звыш тысячы танцораў. Яны прыехалі ў Маладзечна з розных куткоў Беларусі і прадставілі амаль сто нумароў на галоўнай сцэне Палаца культуры (ініцыятара крэатыўнага праекта).

– Прыемна, што некаторыя калектывы на конкурсе ў другі раз, – заўважыў мастацкі кіраўнік «Кропкі» харэограф Палаца Яўгеній Завадскі. – Абсалютна ўсім словы ўдзячнасці за тое, што далучыліся да нашага праекта. Балетмайстры і канкурсанты паказалі высокі ўзровень майстэрства.

Творчыя спаборніцтвы разгарнуліся ў шасці ўзроставых катэгорыях. Самым юным удзельнікам ледзь споўнілася тры гады, самыя дарослыя – старэйшыя за 31. Сёлета канкурсантаў было значна больш, чым летась, асабліва сярод старэйшых выканаўцаў. Удзельнікі выступалі ў дзесяці намінацыях – ад класічнага да сацыяльнага танца. Найбольшая колькасць – эстрадныя кампазіцыі. Упершыню была заяўлена намінацыя «Патрыятычны танец». Прымалі ўдзел у конкурсе і дзеці з асаблівасцямі развіцця.

У складзе журы – выключна прафесіяналы. Сярод іх заслужаны артыст Рэспублікі Беларусь, саліст акадэмічнага ансамбля «Харошкі» Васілій Прыходзька, пастаноўшчык нумароў для «Еўрабачання», рэжысёр і харэограф шматлікіх тэлевізійных праектаў, шоу, канцэртаў Дзмітрый Залескі.

У ліку лепшых выканаўцаў «Кропкі» былі і маладзечанцы. Гэта прадстаўнікі студыі бальнага танца «Каскад», узорнага харэаграфічнага ансамбля «ВіЗаВі», студыі танца «Fuego» (усе яны працуюць у Палацы культуры), студыі сучаснага танца «Plastilin», харэаграфічных калектываў «Капрыз» і «Акварэль» гімназіі-каледжа мастацтваў, VICTORIA DANCE STUDIO.

Гран-пры заваяваў цэнтр прафесійнага харэаграфічнага мастацтва (Мінск). Яго прадстаўнікам уручаны сертыфікат на 500 рублёў.

Таксама разыгралі два кошыкі з мясной прадукцыяй ад ТАА «Велес-Міт» сярод балельшчыкаў. Дзякуючы іх гарачай падтрымцы Палац культуры на імгненні ператвараўся ў сапраўдны стадыён, дзе грымелі барабаны, гучалі дудкі і з усіх бакоў чуліся «крычалкі».

Тэкст і фота: Ірына РАБУШКА

Прочитано 392 раз
Ірына Рабушка

Этот адрес электронной почты защищён от спам-ботов. У вас должен быть включен JavaScript для просмотра.