29.05.2023 9:49

Тэатральная сцэна -- для абмену вопытам

Упершыню ў рамках абменных гастроляў у Мінскі абласны тэатр лялек «Батлейка» прыехалі акцёры заслужанага калектыву Рэспублікі Беларусь Гродзенскага абласнога тэатра лялек.

Для юных гледачоў яны «прывезлі» развіццёвую казку «Вясёлая ферма» маладога рэжысёра Валерыя Карышава. Гэта своеасаблівая гульня з простым зразумелым сюжэтам і інтэрактывам. У спектаклі разыграны розныя жыццёвыя сітуацыі аб узаемадапамозе і дружбе, якая, як і павінна быць у казцы, перамагае. У выніку на ферме ўсе зверы падружыліся, нават кот з курамі і мышамі.

Гродзенцы прыехалі ўсяго на дзень і свой спектакль паказалі двойчы. На абодвух паказах быў аншлаг.

-- У нашай краіне сем дзяржаўных тэатраў лялек, усе калектывы сябруюць паміж сабой, -- заўважае дырэктар «Батлейкі» Таццяна Чаеўская. -- Сустракаемся на фестывалях, якіх, на жаль, не так шмат, і на абменных гастролях. На сцэнічных пляцоўках акцёры дэманструюць свае лепшыя творчыя работы. Таму такія сустрэчы выдатная магчымасць абмяняцца вопытам, а таксама запрасіць на разавыя пастаноўкі рэжысёраў, кампазітараў, мастакоў.

-- Мы вельмі хваляваліся, калі ехалі ў Маладзечна, -- далучаецца да размовы актрыса, вядучы майстар сцэны Гродзенскага абласнога тэатра лялек Людміла Паўлоўская, якая аддала абранай прафесіі 40 гадоў. -- Ваш горад вельмі ўтульны, чысты, зялёны, як, зрэшты, і ўся наша Беларусь. Вельмі прыгожы з асаблівай архітэктурай будынак «Батлейкі». Бачна, што ў яго свая гісторыя. Хваляваліся мы і наконт выступлення перад новай для нас публікай.

Але перажыванні аказаліся дарэмнымі. Юныя гледачы лёгка адгукаліся на інтэрактыў гродзенцаў і гучна апладзіравалі ім. А акцёр Вячаслаў Амбрасевіч увогуле сарваў авацыі. На гастролі ў Маладзечна ён трапіў у дзень свайго 25-годдзя. Яму адрасавалі цёплыя віншаванні і падрылі кветкі.

Калектыў «Батлейкі» мяркуе ўмацаваць сяброўства і абменныя гастролі з тэатрамі краіны. Нядаўна маладзечанцы таксама пабывалі на гастролях у Гродзенскім абласным тэатры лялек, дзе з поспехам прайшоў спектакль «Конек-Горбунок» украінскага рэжысёра Міхаіла Урыцкага, які ў свой час быў запрошаны для яго пастаноўкі ў наш горад.

«Батлейкаўцы» пачалі ўжо рыхтавацца да летняга сезона, каб парадаваць творчасцю дзяцей і падлеткаў, якія будуць адпачываць у аздараўленчых лагерах. Па адпаведных установах гастролі запланаваны з ліпеня па сярэдзіну жніўня. А ў чэрвені яны па-ранейшаму запрашаюць усіх жадаючых завітаць у краіну мастацтва «на стацыянары» ў тэатры. У летнім рэпертуары неардынарная для тэатра лялек прэм’ера гэтага года «Помня героев Победы», разлічаная для гледачоў старэйшых за 12 гадоў, мінулагодняя прэм’ера музычная казка-гульня «Гусяня Дарафей», а таксама іншыя спектаклі і канцэртная праграма.

-- За гэты год нашы творчыя пастаноўкі ўбачылі больш за дзевяць тысяч гледачоў, -- працягвае дырэктар. -- Нядаўняя пандэмія каранавіруса ўнесла свае карэктывы і ў нашу работу, калі публіцы даводзілася ствараць адпаведныя ўмовы знаходжання ў тэатры з захаваннем сацыяльнага дыстанцыравання, з-за чаго запаўняць залу ў поўным аб’ёме было немагчыма. Відавочна, што гледачы засумавалі па мастацтве, таму з асаблівым задавальненнем прыходзяць да нас.

А ў бліжэйшых нашых планах -- выступленне ў рамках Нацыянальнага фестывалю беларускай песні і паэзіі «Маладзечна-2023», што адбудзецца ў пачатку чэрвеня. На тэатральнай сцэне пройдуць два спектаклі: прэм’ера 2021 года -- экалагічная казка «История маленькой улитки» (рэжысёрская спроба акцёра гэтага тэатра Міхаіла Асановіча) і чароўная казка «Цудоўная дудка» ў пастаноўцы Мікалая Андрэева, які амаль 20 гадоў з’яўляўся галоўным рэжысёрам «Батлейкі».

Тэкст і фота: Ірына РАБУШКА.
Таццяна Чаеўская (першая справа) і акцёры Гродзенскага абласнога тэатра лялек Наталля Дацэнка, Вольга Авасількі, Аляксей Кірмуць, Вячаслаў Амбрасевіч, Людміла Паўлоўская.

Прочитано 318 раз
Ірына Рабушка

Этот адрес электронной почты защищён от спам-ботов. У вас должен быть включен JavaScript для просмотра.