13.12.2021 14:21

Маладзечанскія замалёўкі і стаўбцоўскія матывы заваявалі Прыз глядацкіх сімпатый ад «Мінскай праўды»

Сёлета ў Мар’інай Горцы віталі ўдзельнікаў і гасцей ХVІІ абласнога фестывалю народнай творчасці «Напеў зямлі маёй». У конкурснай праграме бралі ўдзел аматарскія калектывы з 22 рэгіёнаў Міншчыны.

Усе выступленні вылучаліся мясцовым каларытам, яркімі вобразамі і сюжэтамі і нікога не пакінулі раўнадушнымі.

Інфармацыйнае агенцтва «Мінская праўда» нават вырашыла сабраць конкурсныя нумары і размясціць іх на сваім сайце, каб кожны, хто не змог асабіста прысутнічаць на фестывалі, атрымаў асалоду ад творчых знаходак аматарскіх калектываў Міншчыны. Акрамя таго, з 8 па 12 снежня жыхары цэнтральнага рэгіёна маглі таксама анлайн прагаласаваць за лепшае, на іх погляд, выступленне і падтрымаць такім чынам землякоў.

Барацьба з першых дзён разгарэлася не на жарт. Падабайкі актыўна з’яўляліся пад відэа кожнага рэгіёна. Галасаванне набірала абароты. У лідары адразу вырваліся маладзечанцы. Але не паспелі апошнія перавесці дух, як іх нагналі і апярэдзілі стаўбчане. Страсці не сціхалі да канца тыдня. Гонка за першае месца працягвалася, пакуль выступленне народнага ансамбля песні і танца «Спадчына» імя І. Сушко Палаца культуры Маладзечна, дзякуючы гарачай падтрымцы землякоў і гасцей краю, трывала не замацавалася на верхняй прыступцы. Жвавае і яркае выступленне пад назвай «Кірмашовыя замалёўкі» набрала аж 14893 галасы. А «Беларускія матывы» ў выкананні духавога аркестра «Віціны» і ўзорнага ансамбля мажарэтак «Феерыя» Стаўбцоўскай дзіцячай школы мастацтваў заваявалі 13664 галасы. Таму аматарскія калектывы па праве сталі ўладальнікамі тытула «Прыз глядацкіх сімпатый».

Падарункі і цырымонія ўзнагароджання чакаюць пераможцаў. Віншуем аматарскія калектывы з Маладзечна і Стаўбцоў і жыхароў гэтых раёнаў з дастойным вынікам, дасягнутым ва ўпартай барацьбе, і жадаем, каб культурная спадчына рэгіёнаў, вобласці і краіны квітнела і памнажалася.

Автор статьи: Алена Мурач
Автор фото: Алена Таборка

Источник: Mlyn.by

Прочитано 343 раз Последнее изменение 13.12.2021 14:21
Заимствованная инф.

Этот адрес электронной почты защищён от спам-ботов. У вас должен быть включен JavaScript для просмотра.