29.09.2021 14:12

Узвышанае і зямное на мастацкіх палотнах

23 прафесійных мастакоў з Беларусі, Расіі, Украіны і Малдовы, кожны з якіх працуе ў сваёй стылістыцы, з’яднаў VІ Міжнародны пленэр «Святасць зямлі беларускай». Удзельнікаў выніковай выстаўкі віталі ў мясцовым Палацы культуры. Сярод іх быў і адзін наш зямляк.

Творчасць шчырага сэрца

На гэты раз пленэр прысвячаўся памяці мітрапаліта Філарэта (Вахрамеева), першага Патрыяршага Экзарха ўсяе Беларусі. Удзельнікаў пленэру можна смела назваць мастакамі шчырага сэрца, бо яны дзеляцца з гледачамі сваім бачаннем свету і творчым прыкладам дапамагаюць зразумець першачарговыя эстэтычныя каштоўнасці. Традыцыйна ініцыятар мерапрыемства — прыход царквы святой Ефрасінні Полацкай у Івянцы, настаяцель якога протаіерэй Віктар Перагудаў па благаславенні епіскапа Маладзечанскага і Стаўбцоўскага Паўла з’яўляецца духоўнікам пленэру. Таксама ён прыняў удзел у цырымоніі ўзнагароджання ўдзельнікаў, якія былі адзначаны за высокае прафесійнае майстэрства, прапаганду духоўна-эстэтычных каштоўнасцей і асабісты ўклад у рэалізацыю дабрачыннага праекта.

— З вялікім захапленнем гляджу на мастацтва, створанае творцамі, — заўважыў епіскап Павел у прывітальным слове. – Філарэт прыехаў да нас з Расіі. Ён палюбіў Беларусь і ўсё жыццё прысвяціў ёй, яднанню царквы, дзяржавы і народа.

З выніковай выстаўкай VІ Міжнароднага пленэру «Святасць зямлі беларускай» уважліва азнаёміліся епіскап Маладзечанскі і Стаўбцоўскі Павел, старшыня грамадскага аб’яднання «Беларускі саюз мастакоў» Глеб Отчык, начальнік аддзела ідэалагічнай работы, культуры і па справах моладзі райвыканкама Вольга Клепакова.

Колер павінен жыць

На выніковай выстаўцы былі прадстаўлены дзве работы нашага земляка Аляксандра Грышкевіча. Цяпер ён жыве ў Мінску, але і сёння ў родным Маладзечне ёсць дом яго бацькоў, які Аляксандр не забывае. Менавіта ў нашым горадзе ён зрабіў першыя крокі ў мастацтва, а яго першымі настаўнікамі былі Кастусь Харашэвіч і Ядвіга Раздзялоўская.

— У міжнародным мастацкім пленэры ўдзельнічаў і раней, гэта выдатны абмен вопытам, — дзеліцца эмоцыямі мастак. – У творчасці аддаю перавагу пейзажам. Адна з маіх работ называецца «Далёкае святло» — гэта фрагмент загарадзі, што ўбачыў у Замасцянах. Убраў толькі лішнія дэталі і дадаў… святла. Менавіта яго мы чакаем, калі вяртаемся дамоў. Яшчэ адна карціна «Тры вязы» — натурны пейзаж, зроблены ў тых жа мясцінах. Імкнуўся, каб у ёй таксама адчувалася жыццё. У мяне няма колеру, якому аддаю перавагу, выкарыстоўваю ўсю палітру і перакананы, што колер павінен жыць.

Увогуле, мастакі заўважаюць, што для таго каб ствараць палотны, неабходна шмат ведаць, а самае галоўнае, трэба быць у згодзе з душой, з любоўю ставіцца да людзей і ўсяго жывога на зямлі. Безумоўна, вельмі важна для кожнага творцы, каб яго мастацтва ўбачылі і ацанілі. Выніковая выстаўка пленэру не засталася без увагі прадстаўнікоў мясцовай улады. Да прысутных звярнулася начальнік аддзела ідэалагічнай работы, культуры і па справах моладзі райвыканкама Вольга Клепакова, якая падкрэсліла агульную рысу ўсіх палотнаў: іх яднае любоў да радзімы.

Мастацтва і прыгажосць лечаць нашы душы, ратуюць ад чэрствасці і абыякавасці, саграваюць сэрцы цяплом і надзеяй. У гэтым пераканана і дырэктар Палаца культуры Святлана Сарока — ініцыятар і арганізатар шматлікіх маштабных праектаў, якія з поспехам былі рэалізаваны і набылі доўгае творчае жыццё на маладзечанскай зямлі, у тым ліку міжнародны пленэр «Святасць зямлі беларускай». Сваімі думкамі пра ўзвышанае і зямное падзяліўся старшыня Беларускага саюза мастакоў Глеб Отчык.

Дабрачыннасць у фарбах

Увогуле, гэта мерапрыемства з’яднала прадстаўнікоў не толькі праваслаўнай, але і каталіцкай канфесіі. З прамовай выступіў ксёндз-дэкан Эдмунд Даўгіловіч-Навіцкі, які асабіста ведаў мітрапаліта Філарэта і ў чарговы раз падкрэсліў яго высокія чалавечыя якасці. Шмат неабыякавых людзей з розных арганізацый, устаноў культуры і мастацтва прыклалі намаганні для рэалізацыі пленэру «Святасць зямлі Беларускай». Дзякуючы Маладзечанскай епархіі Беларускай праваслаўнай царквы, грамадскаму аб’яднанню «Беларускі саюз мастакоў», братэрству ў гонар Віленскіх пакутнікаў з горада Мінска, Палацу культуры нашага горада і іншым арганізацыям, якія садзейнічалі яго правядзенню, творчы форум у шосты раз упэўнена крочыць па беларускай зямлі.

Дзекан Маладзечанскага дэканата, пробашч парафіі св. Юзафа Эдмунд Даўгіловіч-Навіцкі і сакратар епархіяльнага ўпраўлення Маладзечанскай епархіі айцец Віталій Багданёнак.

Сёлета яго асаблівасцю стаў удзел студэнцкай моладзі і дзяцей, пераможцаў Усебеларускага конкурсу дзіцячых тэматычных малюнкаў. Таксама арганізатары прадугледзелі магчымасць продажу мастацкіх работ. Выручаныя сродкі пойдуць на рэалізацыю сацыяльнага дабрачыннага праекта «Мастакі – дзецям (з асаблівасцямі развіцця)».

На выніковай выстаўцы былі і творчыя падарункі ўдзельнікам пленэру ад узорнай студыі эстраднай песні «Спяваем разам» Палаца культуры і заслужанага калектыву Рэспублікі Беларусь сімфанічнага аркестра музычнага каледжа імя М.К. Агінскага пад кіраўніцтвам Рыгора Сарокі.

Ірына РАБУШКА.
Фота: Аляксей ПЛАТКО.

Прочитано 591 раз Последнее изменение 29.09.2021 14:12
Ірына Рабушка

Этот адрес электронной почты защищён от спам-ботов. У вас должен быть включен JavaScript для просмотра.