10.07.2021 15:32

З адною думкаю аб шчасці Беларусі

У Вязынцы, на малой радзіме Янкі Купалы, адгучала звонкімі галасамі Рэспубліканскае свята паэзіі, песні і народных рамёстваў «З адною думкаю аб шчасці Беларусі…».

Менавіта на малой радзіме паэта кожны ліпень збіраюцца ўсе, хто з павагай і любоўю ставіцца да асобы і творчасці класіка. І нават летняя спякота не ўносіць карэктывы ў планы людзей.



Распачалося свята ўскладаннем кветак да помніка Песняру.

Госці наведалі музей, у якім адноўлены інтэр’ер хаты, дзе нарадзіўся будучы паэт. Тут можна ўбачыць асабістыя рэчы яго бацькоў, адчуць подых далёкага ўжо часу, дакрануцца да падзей жыцця маладой сям’і Луцэвічаў. І колькі б разоў ні прыходзіў сюды, кожны раз сэрца напаўняюць трапяткія пачуцці.

Па традыцыі члены Саюза пісьменнікаў Беларусі, беларускія літаратары чыталі вершы-прысвячэнні Янку Купалу, узнёсла гучала іх прызнанне ў любові да мілай сэрцу Бацькаўшчыны.

У культурнай праграме прынялі ўдзел самадзейныя артысты з Маладзечанскага раёна. Вакальны гурт «Суседкі» Заскавіцкага СДК і раней радаваў сваёй творчасцю гледачоў на шматлікіх творчых мерапрыемствах. У Вязынцы калектыў выступаў упершыню. Святлана Крысюк, Наталля Зянько, Ірына Капуста, Вераніка Міхалоўская, Вера Лоўчая разам з кіраўніком гурту Валянцінай Бобрык сустракалі шаноўных гасцей духмяным караваем і прывітальнай песняй.Акампаніраваў ім на акардыёне Віктар Сыракваш. На сцэнічнай пляцоўцы яны выканалі тры музычныя кампазіцыі: «Сустрэча з домам», «Ночка цёмная», «Гармонік». Гледачы гучна апладзіравалі «Суседкам».

Госці свята з цікавасцю азнаёміліся з разнастайнымі экспазіцыямі. На выставах-продажах вырабаў дэкаратыўна-прыкладнога мастацтва зачароўвалі сваёй прыгажосцю работы майстроў. Кожны мог паўдзельнічаць у майстар-класах, а на памяць прывезці фотаздымкі з занатаванымі імгненнямі каларытных краявідаў і падзей святочнага дня.




У ТЭМУ

Мемарыяльны Купалаўскі запаведнік «Вязынка» ўваходзіць ў Спіс сусветнай спадчыны ЮНЕСКА. Пра гэту мясціну добра ведаюць не толькі ў рэспубліцы, але і за яе межамі.

Рэпартаж са свята чытайце ў адным з бліжэйшых нумароў «Маладзечанскай газеты».

Людміла ЦАР.
Фота: Аляксей ПЛАТКО.

Прочитано 605 раз Последнее изменение 10.07.2021 15:32
Людміла Цар

Этот адрес электронной почты защищён от спам-ботов. У вас должен быть включен JavaScript для просмотра.