17.10.2022 8:55

Вузкапалыя ракі пасяліліся на «Васькаўцах»

У вадасховішча вучоныя запусцілі каля 800 асобін гэтага віду ракападобных. Пасля таго як жывёлы дасягнуць пэўнага памеру, іх можна будзе здабываць.

Васькаўскае вадасховішча становіцца домам для вузкапалых ракаў. Васькаўскае вадасховішча становіцца домам для вузкапалых ракаў.

Перавозкай «перасяленцаў» займаліся работнікі Нацыянальнай акадэміі навук Рэспублікі Беларусь Анатолій Аляхновіч і Уладзімір Разлуцкі. Ракі былі вылаўлены ў возеры Кічына (Сенненскі раён Віцебскай вобласці). Дарога заняла некалькі гадзін. На працягу гэтага часу рабіліся прыпынкі. Для жывёл трэба было ладзіць душ, каб іх жабры не перасыхалі. У новы дом «навасёлы» прыехалі ў выдатным стане.

— Васькаўскае вадасховішча падыходзіць для жыцця і размнажэння ракаў па ўсіх параметрах, — адзначыў Анатолій Аляхновіч. — Вадаём гэты чысты, праточны, тут расце шмат відаў раслін. Большасць з пераселеных ракаў — самкі. Кожная з іх здольная адкласці па 100-200 яек. Такім чынам, праз некалькі гадоў папуляцыя павінна значна павялічыцца.

Вучоны паведаміў, што ў вадаёмах Беларусі водзяцца тры віды ракаў. Вузкапалы з’яўляецца прамысловым. Шыракапалы занесены ў Чырвоную кнігу Рэспублікі Беларусь.

Амерыканскі паласаты рак — чужародны від. Ён пераносіць небяспечнае віруснае захворванне — рачыную чуму. Дзе з’яўляецца «амерыканец», там іншыя віды ракаў знікаюць.

Вось чаму так важна стварыць як мага больш папуляцый абарыгенаў. Гэта гарантуе выжывальнасць мясцовых відаў.

Пра біялогію і асаблівасці вузкапалых ракаў расказвае Анатолій Аляхновіч.

Уладзімір Разлуцкі дадаў, што прэснаводныя ракі ўсёедныя. У іх рацыён уваходзяць і расліны, і жывёлы. У некаторых вадаёмах ракі складаюць асноўную частку жывёльнай біямасы. Яны вельмі патрэбныя для падтрымання ўстойлівасці воднай экасістэмы.

Як адзначыў начальнік Маладзечанскай раённай інспекцыі прыродных рэсурсаў і аховы навакольнага асяроддзя Уладзіслаў Чарноў, у ходзе спецыяльных абследаванняў у раёне былі выяўлены 12 месцаў, дзе жывуць «чырванакніжныя» шыракапалыя ракі. Усе гэтыя месцы ўзяты пад ахову. Аднак іх вузкапалых «калег» вучоныя не знайшлі. Цяпер відавая разнастайнасць водных насельнікаў Маладзечаншчыны павялічылася.

— Перасяленне вузкапалых ракаў праходзіць у рамках спецыяльнай дзяржаўнай праграмы, — падкрэсліў Уладзіслаў Віктаравіч. — Фінансуецца яна з абласнога бюджэту. Запланавана запусціць жывёл і ў вадаём ля вёскі Сычавічы.

Намеснік начальніка Маладзечанскай міжраённай інспекцыі Дзяржаўнай інспекцыі аховы жывёльнага і расліннага свету Сяргей Язубец нагадаў правілы здабычы вузкапалых ракаў: рабіць гэта можна толькі спецыяльна прызначанымі прыстасаваннямі са строга вызначанымі параметрамі (ракалоўкамі). Нельга здабываць ракаў з даўжынёй цела менш за 10,5 сантыметра. Забаронена выкарыстоўваць аквалангі, плавальныя сродкі і асвятляльныя прыборы. Норма лоўлі — не больш за 2 кілаграмы за суткі на чалавека.

УВАГА! За кожнага дазволенага да здабычы рака, здабытага звыш нормы або незаконным шляхам, устаноўлена кампенсацыя ўрону прыродным рэсурсам у памеры 1,5 базавай велічыні. Асобы, вінаватыя ў здабычы дзікіх жывёл, што адносяцца да відаў, уключаных у Чырвоную кнігу Рэспублікі Беларусь, прыцягваюцца да крымінальнай адказнасці.

Тэкст і фота: Алег БЯГАНСКІ.

Прочитано 768 раз
Алег Бяганскі

Этот адрес электронной почты защищён от спам-ботов. У вас должен быть включен JavaScript для просмотра.