Больш за 1200 асобін вясёлкавай стронгі (радужной форели) запусцілі ў адну з сажалак у раёне Пятроўшчыны (сістэма ракі Бярэзіны). Агульная вага «навасёлаў» склала паўтоны, пры гэтым кожная асобіна важыць каля 400 грамаў. Малькі гадаваліся ў доследным рыбгасе «Лахва» Лунінецкага раёна Брэсцкай вобласці.
Зарыбленне арандаванага вадаёма ажыццявіла таварыства з дадатковай адказнасцю «Зігер». Раней сажалку папоўнілі тры тоны карпа і больш чым трыццаць пяць тысяч лічынак шчупака. У наступным годзе арандатары плануюць арганізаваць платную рыбалку. Да гэтага навасёлы будуць абжывацца ў новым доме і інтэнсіўна расці.
— Арэнда вадаёмаў – адзін са спосабаў уключэння ў гаспадарчы абарот і далейшага рацыянальнага выкарыстання прыродных аб’ектаў, — гаворыць начальнік раённай інспекцыі па ахове прыроды Уладзіслаў Чарноў. – Дзякуючы гэтаму павышаецца турыстычная прывабнасць тэрыторыі, ствараюцца новыя рабочыя месцы, фарміруюцца камфортныя ўмовы для адпачынку. У выніку выйграюць як госці і жыхары раёна, так і суб’екты гаспадарання.
ТДА «Зігер» выконвае ўсе ўмовы дагавора арэнды — зарыбляе вадаём, добраўпарадкоўвае прыбярэжную паласу, стварае інфраструктуру для адпачынку. Важна, што на Маладзечаншчыну прыцягваюцца прыватныя інвестыцыі, пры гэтым бюджэтныя сродкі могуць выкарыстоўвацца па іншых кірунках.
— Цяпер у раёне арандуюцца тры водныя аб’екты. Усяго ўзяць у арэнду можна каля двух дзясяткаў вадаёмаў. Такім чынам суб’екты гаспадарання могуць скарыстаць вопыт, які ўжо ёсць, і асвоіць новы і карысны для ўсіх від дзейнасці, — падкрэсліў Уладзіслаў Чарноў.
Цікава ведаць. Вясёлкавая стронга з’яўляецца папулярным аб’ектам рыбалоўства. Радзі-
ма гэтага віду ласасёвых — Паўночная Амерыка. У беларускія вадаёмы рыбу пачалі перасяляць у пачатку дваццатага стагоддзя. Адна асобіна вырастае да 50-60 сантыметраў, пры гэтым яе вага складае 3-5 кілаграмаў (максімальная – 22 кілаграмы). Жыве вясёлкавая стронга каля дзесяці гадоў. Яна лічыцца адным з біялагічных індыкатараў чысціні вадаёмаў.
Фота: Алег БЯГАНСКІ.