12.10 9:59

Ехаў казачнік Бай… І ў Гарадку спыніўся

Источник

Як зацікавіць малышоў беларускімі чытанкамі? Праз гульню, тэатральныя пастаноўкі, любоў дзяцей да малявання, іх імкненне да ўсяго новага і нязведанага.



У гэтым на сваім вялікім вопыце пераканалася супрацоўніца Гарадоцкай сельскай бібліятэкі Надзея Леган. Нядаўна разам з выхавальніцай дашкольнай групы Гарадоцкага вучэбна-педагагічнага комплексу дзіцячы сад — базавая школа Зояй Дзешчыц яна правяла літаратурную гасцёўню, прысвечаную 105-годдзю з дня нараджэння народнага паэта Беларусі Максіма Танка.
Дзеці даведаліся сапраўдныя імя і прозвішча пісьменніка — Яўгеній Скурко, а таксама тое, што ён нарадзіўся на Мядзельшчыне, непадалёк ад нашых мясцін.

Удзельнікі літаратурнай гасцёўні паспрабавалі тэатралізаваць казку «Ехаў казачнік Бай». Зоя Уладзіміраўна пераканаўча ўвайшла ў ролю казачніка, дзеці з радасцю дапаўнялі і давалі згоду на працяг: усяго толькі і трэба было паўтараць запаветнае слоўца «Бай!».

Прэзентацыя казкі «Жук і слімак» у іх выклікала вялікую цікавасць. Аказваецца, у іх групе жыве сапраўдны афрыканскі слімак – цёця Каця, за якой малышы вельмі любяць назіраць. Яны з радасцю адгадвалі загадкі, адказвалі на пытанні па казцы, пад беларускія мелодыі рабілі ілюстрацыі для будучай выстаўкі малюнкаў.

Не абышлося і без пачастункаў: Надзея Іванаўна заварыла для сваіх юных чытачоў гарбату з духмяных зёлак, прапанавала салодкія гасцінцы.

Дабрынёй і вялікай любоўю да дзяцей прасякнуты творы Максіма Танка, і ў час літаратурнай гасцёўні гэта адчуў кожны маленькі ўдзельнік, а дарослыя дапамаглі ім. «Калі вы самі навучыцеся чытаць, будзеце знаёміцца з новымі цікавымі кнігамі, сярод якіх абавязкова будуць і творы Максіма Танка!», — выказала надзею бібліятэкар.

А радкі пра казачніка Бая дзеці вывучылі ў час гасцёўні. Хто з нас іх не памятае:
— Ехаў казачнік Бай цераз сёлы і гай. Баіць ці не?
— Бай!


Фота: архіў ГАРАДОЦКАЙ БІБЛІЯТЭКІ.

Галерея изображений

Просмотреть встроенную фотогалерею в Интернете по адресу:
http://mgazeta.by/ru/kultura/item/1725-ekha-kazachnik-baj-i-garadku-spyni-sya.html#sigProId3391388cbf
Прочитано 1154 раз Последнее изменение 12.10 9:59
Анжаліка Крупянькова

Этот адрес электронной почты защищён от спам-ботов. У вас должен быть включен JavaScript для просмотра.

Добавить комментарий


Защитный код
Обновить