Гэта адна з самых вялікіх і паспяховых школ Маладзечаншчыны. Тут вучацца больш за тысячу шэсцьсот хлопчыкаў і дзяўчынак. А ў першыя класы сёлета прыйшлі 177 чалавек. «Школа, дзе кожны паспяховы» — такога дэвізу прытрымліваецца «чатырнаццатая».
Урачыста быў падняты Дзяржаўны сцяг Рэспублікі Беларусь. Адказную справу даверылі адзінаццацікласнікам — кандыдату ў майстры спорту, прызёру рэспубліканскіх і абласных спаборніцтваў па плаванні Кірылу Рудаму і
выдатніцы вучобы, лідару школьнага самакіравання Таццяне Бусел.
З прывітальнымі словамі і віншаваннямі з пачаткам навучальнага года да прысутных звярнуўся Анатолій Ісачанка. Асаблівыя словы прагучалі ў адрас самых юных вучняў і тых, хто ўжо стаіць на парозе выбару прафесіі. Старшыня аблвыканкама пажадаў усім настаўнікам найперш цярпення, а бацькам – мудрасці. Свае пажаданні ён пакінуў у кнізе ганаровых гасцей установы.
Дырэктару СШ №14 Каліне Капуцкай Анатолій Ісачанка уручыў сертыфікат на набыццё камп’ютарнага класа. Дзецям перадалі кнігі і спартыўны інвентар.
Першакласнікі атрымалі падарункі ад Прэзідэнта Рэспублікі Беларусь Аляксандра Лукашэнкі – кнігі «Беларусь – наша Радзіма». Анатолій Міхайлавіч разам з іншымі афіцыйнымі гасцямі ўручыў іх вучням 1 «Д» класа. Дзеці з цікавасцю адразу пачалі гартаць старонкі разам са сваёй першай настаўніцай Галінай Пракаповіч.
Анатолій Ісачанка і госці прайшліся па светлых калідорах і школьных класах, завіталі ў кабінет, дзе вывучаюць кітайскую мову, у абласны рэсурсны цэнтр па шахматах, які пачаў тут працаваць з новага навучальнага года. Старшыню вельмі ўразіла ўстанова, дзе ёсць, як ён заўважыў, усё магчымае для набыцця добрых ведаў, спасціжэння жыцця. На яго погляд, сучасная школа павінна ў першую чаргу выхоўваць чалавека, які любіць сваіх бацькоў, паважае педагогаў і цэніць радзіму. Старшыня аблвыканкама быў узрушаны падарункам ад вучняў – прыгожай карцінай, якую яны зрабілі самі.
Фота: Аляксей Платко.